Como
cada ano por estas datas, despois de varios meses de duro traballo, toca mover
un pouco as alas e sacudir a graxa que un vai acumulando pouco a pouco e case
sen decatarse. Saír uns días do entorno que un coñece abondamente, supón un
exercicio de limpado e secado dos lentes cos que un mira o mundo, para achar
distintas formas de proceder na vida, e así acubillar novos coñecementos e
experiencias, para logo reflexionar sobre o lugar que os demáis e nós propios
ocupamos na globalidade, en todos os aspectos.
O
aspecto que máis interesa, aquí, quizás sexa o turístico, e por iso fixamos a
atención no que para nós poidan ser modelos a seguir e dos que debemos aprender
grandemente, neste caso por tratarse dun destino turístico de calidade no que a
sustentabilidade xoga un papel fundamental. O lugar sobre o que estamos a
escribir é unha viliña chamada Giethoorn, que se localiza na provincia
neerlandesa de Overijssel, máis ou menos no centro e norte do país.
Giethoorn
é unha pequena Venecia do norte, por asentarse sobre parcelas de terra que
emerxen dun grande lago entre as cales se forman canais que separan as
vivendas. Giethoorn non é un parque temático construído ou restaurado con fins
turísticos senón que é unha realidade cotiá que nace das necesidades dos seus
habitantes, como a de calquera vila do mesmo tamaño en calquera lugar do mundo.
En Giethoorn non hai nada especial, e ao tempo, todo é especial.
Cando
un chega a Giethoorn atopa xente do lugar, partindo leña, cuidando o xardín,
cavando na horta, lixando unha xanela, pintando unha porta ou sentado na eira
da súa propia casa, contemplando a xente pasar.
Hai
moita xente que pasa por Giethoorn a pasear, simplemente, ou que aluga algunha
das barcas eléctricas que por un prezo de 25 euros permitirá un paseo polos
canais e polo lago durante un máximo de dúas horas. Tamén é posible parar nun
café ou nalgún restaurante dos que hai por alí. Non hai acopio de restaurantes nin
cafeterías en Giethoorn, tan só os suficientes para darlle vida e sustentar as
necesidades dos que alí viven, e por suposto, dos que vivirán no futuro.
Acceso ao lago de Giethoorn |
Non
só os habitantes de Giethoorn son cuidadosos con Giethoorn, senón que os
visitantes, do mesmo xeito, miman o lugar como se fose deles, como se unha
especie de feitizo os captivase e non lles permitise traspasar as fronteiras do
indecoroso. Quizás os ambientes tamén eduquen e sexan quen de amansar ao cabalo
máis salvaxe, por iso é importante que os veciños de Giethoorn teñan este
aspecto moi presente.
En
Giethoorn non hai campo de fútbol, nin de pádel, nin de golf, nin clubes de
amigos que se poidan reunir nun casino, tan só unha igrexa protestante de
tamaño mediano que decora a entrada segundo se entra desde un estacionamento pequeño
a carón dun feixe de leña que un veciño cortaba ao nós chegar.
Algunhas
casas de Giethoorn posúen unha característica privativa do lugar, unha pequena
xoroba como as dun camello ou dromedario, que as distinguen do resto das
holandesas construídas completamente planas.
Casas camello, con xoroba |
En
Giethoorn hai pequenos hoteis e casas que se poden alugar, por longas temporadas
ou por días. Son casas que teñen de especial o non teren nada especial no
entorno de Giethoorn, casas normais como as de calquera veciño que lles dan un
uso de aloxamento público.
Giethoorn
cumpre con todas as características de sustentabilidade que se poida desexar
para un destino turístico:
- Os
veciños de Giethoorn poden vivir en Giethoorn e explotar os seus propios
recursos.
- Os
veciños de Giethoorn valoran o seu entorno e por iso fan un uso responsable do
mesmo.
- Os
fillos dos veciños de Giethoorn poderán seguir vivindo en Giethoorn nas mesmas
ou mellares condicións nas que viviron os seus pais.
- A
cantidade de visitantes de Giethoorn é inversamente proporcional á capacidade
de absorción dos mesmos.
- Os
veciños de Giethoorn non son ricos, nin aspiran a enriquecerse, tan só viven
dignamente dos seus recursos.
- En
Giethoorn non hai ruídos innecesarios.
- Giethoorn non só se sustenta a través do turismo, pois o turismo convive
harmoniosamente con outros sectores.
No hay comentarios:
Publicar un comentario